موسمیاتی تبدیلی کے وزیر مصدق ملک نے گلیشیئرز کے تیزی سے پگھلنے کے مسئلے سے نمٹنے کے لیے عالمی سطح پر مشترکہ کوششوں پر زور دیا ہے۔

انہوں نے آج اسلام آباد میں ایک تقریب سے خطاب کرتے ہوئے کہا کہ پہاڑوں اور گلیشیئرز پر مشترکہ بین الاقوامی تحقیق کی ضرورت ہے۔

انہوں نے کہا کہ پاکستان نے ماحولیاتی جدت کو فروغ دینے اور ملکی معیشت کو پائیدار اور کم کاربن والی معیشت میں تبدیل کرنے کے عمل میں معاونت کیلئے گرین یونیورسٹی قائم کرنے کی تجویز بھی دی ہے۔

مصدق ملک نے کہا کہ عالمی سطح پر زہریلی گیسوں کے اخراج میں پاکستان کا حصہ ایک فیصد سے بھی کم ہے اور پاکستان اس اخراج میں مزید کمی لانے کیلئے پرعزم ہے۔