صدر آصف علی زرداری اور وزیراعظم محمد شہباز شریف نے ڈیرہ اسماعیل خان کے علاقے زرکانی میں بھارتی سرپرستی میں سرگرم چھ دہشت گردوں کو ہلاک کرنے پر سکیورٹی فورسز کو خراج تحسین پیش کیا ہے۔
اپنے الگ الگ بیانات میں انہوں نے آپریشن کے دوران شہید ہونے والے نائیک غلام مرتضیٰ اور سپاہی تاثیر احمد کو خراج عقیدت پیش کیا۔
انہوں نے آپریشن عزمِ استحکام کے تحت ملک سے دہشت گردی کے مکمل خاتمے کے عزم کا اعادہ کیا۔
صدر آصف علی زرداری نے اپنے بیان میں مادر وطن کے دفاع میں جانیں قربان کرنے والے شہدا کی بہادری، فرض شناسی اور عظیم قربانی کو سراہا۔
انہوں نے شہدا کے اہل خانہ سے دلی تعزیت اور ہمدردی کا اظہار کیا۔ صدر نے کہا کہ دہشت گردوں اور ان کے مقامی سہولت کاروں کی سازشیں ہر قیمت پر ناکام بنائی جائیں گی۔
وزیراعظم شہباز شریف نے اپنے پیغام میں کہا کہ بہادر سپاہیوں کی قربانیاں دہشت گردی کے خلاف پاکستان کے غیر متزلزل عزم کی روشن مثال ہیں۔
