صدر آصف علی زرداری نے پاکستان میں سعودی عرب کے سفیر نواف بن سعید المالکی کو دونوں ممالک کے درمیان دیرینہ برادرانہ اور تذویراتی تعلقات کو مستحکم بنانے پر سراہا ہے۔

وہ ایوان صدراسلام آباد میں سعودی سفیرسے الوداعی ملاقات کے دوران گفتگو کررہے تھے۔

صدر نے کہا کہ پاکستان سعودی عرب کے ساتھ دیرینہ دوستی اور تذویراتی شراکت داری کو نہایت اہمیت دیتا ہے اور مسلسل سعودی حمایت کو قدرکی نگاہ سے دیکھتا ہے۔

انہوں نے اس اعتماد کا بھی اظہار کیا کہ سعودی سفیر نواف بن سعیدالمالکی کے دور میں دوطرفہ تعلقات کے فروغ کیلئے رکھی گئی مضبوط بنیاد آنیوالے برسوں میں دوطرفہ تعاون کی رہنمائی کرتی رہے گی۔

سعودی سفیر نواف بن سعید المالکی نے صدر، حکومت اور پاکستان کے عوام کا اپنے قیام کے دوران بھرپورتعاون پر شکریہ ادا کیا جو 2017 سے پاکستان میں سعودی عرب کے سفیر کی حیثیت سے خدمات انجام دے رہے تھے۔

انہوں نے کہا کہ وہ پاکستان اور اس کے عوام کو ہمیشہ قدر کی نگاہ سے دیکھتے رہیں گے۔