سیکیورٹی فورسز نے بلوچستان کے مختلف علاقوں میں بھارت کے حمایت یافتہ فتنہ الخوارج اور فتنہ الہندوستان سے تعلق رکھنے والے 19 دہشت گردوں کو ہلاک کر دیا ہے۔

آئی ایس پی آر کے مطابق، انٹیلی جنس ایجنسیوں نے ضلع کوئٹہ کے علاقے شعبان میں بھارت کی سرپرستی میں فعال فتنہ الخوارج اور فتنہ الہندوستان کی متعدد پناہ گاہوں کی موجودگی کی اطلاع دی تھی، جو مقامی آبادی کے لیے خطرہ بنے ہوئے تھے۔

علاقے کو دہشت گردوں سے کلیئر کرنے کے لیے سیکیورٹی فورسز پیر سے اس علاقے میں کلیئرنس آپریشن کر رہی ہیں، جس کے دوران سیکیورٹی فورسز نے مؤثر طریقے سے کارروائی کرتے ہوئے دہشت گردوں کی متعدد پناہ گاہوں کو تباہ کر دیا۔ شدید فائرنگ کے تبادلے کے بعد، اب تک بھارتی حمایت یافتہ 13 دہشت گرد ہلاک کیے جا چکے ہیں۔ ان پناہ گاہوں سے اسلحہ، گولہ بارود اور دھماکہ خیز مواد بھی برآمد ہوا ہے۔

آئی ایس پی آر کا کہنا ہے کہ علاقے سے خطرے کے مکمل خاتمے تک کلیئرنس آپریشن جاری رہے گا۔

گزشتہ دو دنوں کے دوران الگ الگ کارروائیوں میں، سیکیورٹی فورسز نے ضلع کیچ اور ضلع کوئٹہ ویسٹ میں خفیہ اطلاعات پر مبنی کارروائیاں کیں۔

ان کارروائیوں کے دوران، اہلکاروں نے دہشت گردوں کا مؤثر طریقے سے مقابلہ کیا۔ شدید فائرنگ کے تبادلے کے بعد 6 دہشت گرد مارے گئے۔

فائرنگ کے تبادلے کے دوران تونسہ شریف، ضلع ڈیرہ غازی خان سے تعلق رکھنے والے وطن کے عظیم سپوت، 39 سالہ صوبیدار محمد جمیل شہادت کے مرتبے پر فائز ہوئے۔