دس بین الاقوامی انسانی حقوق کی تنظیموں نے بی جے پی کی زیر قیادت بھارتی حکومت کی جانب سے انسانی حقوق کے علمبردار معروف کشمیری خرم پرویز اور صحافی عرفان معراج کیخلاف مسلسل انتقامی کارروائیوں کی شدید مذمت کی ہے۔
خرم پرویز کی گرفتاری کے پانچ سال مکمل ہونے پر جاری ایک مشترکہ بیان میں انسانی حقوق کے عالمی نگران اداروں نے دونوں کارکنوں کیخلاف تمام مقدمات کی غیر مشروط واپسی کا مطالبہ کرتے ہوئے بھارت کے غیر قانونی زیرِ قبضہ جموں و کشمیر میں سول سوسائٹی کیخلاف کریک ڈائون فوری طور پر بند کرنے پر زور دیا۔
تنظیموں نے کہا کہ انسانی حقوق کیلئے کام کرنے کی پاداش میں برسوں قید کاٹنے کے بعد ضمانت پر رہائی کے باوجود خرم پرویز اور عرفان معراج کو طویل عدالتی کارروائیوں اور شدید پابندیوں کا سامنا ہے۔
انسانی حقوق کے گروپوں نے کشمیری سول سوسائٹی کو ہراساں کرنے کا سلسلہ روکنے کا بھی مطالبہ کیا اور بین الاقوامی مبصرین کو مقبوضہ جموں وکشمیرکیلئے آزادانہ اور بلا روک ٹوک رسائی دینے پر زور دیا۔