اقوام متحدہ کے سیکرٹری جنرل انتونیو گوتریس نے ایک مرتبہ پھر مشرق وسطیٰ میں امن کے لیے پاکستان کی ثالثی کی کوششوں کو سراہا ہے۔
نیویارک میں معمول کی پریس بریفنگ کے دوران سیکرٹری جنرل کے ترجمان سٹیفن ڈوجارک نے کہا کہ تنازعے کے پائیدار حل تک پہنچنے کا واحد راستہ مذاکرات ہیں۔
انہوں نے کہا کہ اقوام متحدہ کے سیکرٹری جنرل کو امریکہ اور ایران کے درمیان کشیدگی میں ممکنہ اضافے پر گہری تشویش ہے اور وہ پاکستان، قطر، مصر اور دیگر ممالک کی ثالثی کی کوششوں کو قدر کی نگاہ سے دیکھتے ہیں، جو تنازعے کے سیاسی حل کے لیے بھرپور کوششیں کر رہے ہیں۔
