نائب وزیراعظم اسحاق ڈار نے ترقیاتی ایجنڈے کے تحفظ اور اسے اقوام متحدہ کے مرکزی ایجنڈے میں برقرار رکھنے کے لیے اتحاد کی ضرورت پر زور دیا ہے۔
وہ نیویارک میں جی سیونٹی سیون اور چین کے وزرائے خارجہ کے سالانہ اجلاس سے خطاب کر رہے تھے۔
نائب وزیراعظم نے ترقی پذیر ممالک کو درپیش چیلنجز کو اجاگر کرتے ہوئے طے شدہ وعدوں کو ٹھوس نتائج میں تبدیل کرنے پر زور دیا۔
انہوں نے زور دیا کہ مصنوعی ذہانت کے حوالے سے اقوام متحدہ کے ابھرتے ہوئے طریقہ کار کو ٹیکنالوجی کے فرق کو ختم کرنا چاہیے اور عالمی سطح پر مصنوعی ذہانت کی حکمرانی میں ترقی پذیر ممالک کی بامعنی آواز کو یقینی بنانا چاہیے۔
اسحاق ڈار نے زیادہ منصفانہ بین الاقوامی اقتصادی نظام کے فروغ اور اقوام متحدہ کے ایجنڈے میں ترقی کو مرکزی حیثیت دینے کے لیے جی سیونٹی سیون اور چین کے ساتھ مل کر کام کرنے کے پاکستان کے عزم کا اعادہ کیا۔
