نائب وزیراعظم اسحاق ڈار نے مسجد اقصیٰ کے تقدس کی مسلسل پامالی اور مقبوضہ مشرقی بیت المقدس کی تاریخی اور قانونی حیثیت کو تبدیل کرنے کی کوششوں پر تشویش کا اظہار کیا ہے۔
انہوں نے یہ بات نیویارک میں مقبوضہ بیت المقدس کے بارے میں عرب لیگ گروپ کے چار اسلامی ممالک کے مشترکہ وزارتی اجلاس میں شرکت کے دوران کہی۔
اسحاق ڈار نے مقبوضہ بیت المقدس میں اسلامی اور مسیحی مقدس مقامات کے متولی کی حیثیت سے ہاشمی خاندان کے لیے پاکستان کی مستقل حمایت کا اعادہ کیا۔
اسحاق ڈار نے فلسطینی عوام کے حق خودارادیت اور انیس سو سڑسٹھ سے قبل کی سرحدوں کی بنیاد پر ایک ایسی آزاد، خودمختار اور متصل فلسطینی ریاست کے قیام کے لیے پاکستان کی غیر متزلزل حمایت کا اعادہ کیا، جس کا دارالحکومت القدس الشریف ہو۔
