صدرآصف علی زرداری اور وزیراعظم شہباز شریف نے نوجوان نسل پر زور دیا ہے کہ وہ حضرت محمد مصطفی صلی اللہ علیہ وآلہ وسلم کی سیرت طیبہ سے رہنمائی حاصل کریں اور اعلیٰ اخلاقی کردار، سخت محنت اور انسانیت کی خدمت کو اپنی زندگی کا شعار بنائیں۔
عید میلاد النبی صلی اللہ علیہ وآلہ وسلم کے موقع پر اپنے الگ الگ پیغامات میں انہوں نے حضرت محمد مصطفی صلی اللہ علیہ وآلہ وسلم کی ولادت باسعادت پر پوری قوم اور امت مسلمہ کو دل کی گہرائیوں سے مبارکباد پیش کی۔
صدرنے کہا کہ ہمیں معاشرے میں انصاف، مساوات، رواداری، فرقہ وارانہ اور بین المذاہب ہم آہنگی اور انسانی عظمت کو فروغ دینا چاہیے۔
انہوں نے کہا کہ یہ دن ہمیں اللہ تعالیٰ کی اس عظیم نعمت کی یاد دلاتا ہے جس کے ذریعے انسانیت کو ایمان، ہدایت، انصاف، رحم اور اعلیٰ اخلاق کا کامل راستہ عطا کیا گیا۔
وزیراعظم نے کہا کہ ہمیں آج درپیش معاشی، سماجی اور اخلاقی مسائل پر قابو پانے کے لیے اپنی اجتماعی زندگیوں کو اسلام کی فراہم کردہ کامل رہنمائی کے مطابق ڈھالنا ہوگا۔
وزیراعظم نے پاکستان کو مضبوط، خوشحال، پرامن اور فلاحی ریاست بنانے میں اپنا کردار ادا کرنے پر زور دیا۔
