نائب وزیرِ اعظم اور وزیرِ خارجہ محمد اسحاق ڈار فلپائن اور کرغز جمہوریہ کے کامیاب دورے مکمل کرنے کے بعد کرغز جمہوریہ کے شہر چولپون آتا سے اسلام آباد کے لیے روانہ ہوگئے۔
انہوں نے فلپائن کے دارالحکومت منیلا میں آسیان ریجنل فورم(اے آر ایف) کے وزارتی اجلاس میں شرکت کی، جبکہ کرغز جمہوریہ میں شنگھائی تعاون تنظیم (ایس سی او) کی وزرائے خارجہ کونسل کے اجلاس میں بھی شرکت کی۔
ہوائی اڈے پر کرغز ستان کے نائب وزیرِ خارجہ کائرات ایرکینووچ تورسنکولوف، جمہوریہ کرغز میں پاکستان کے سفیر التمش وزیر اور بشکیک میں پاکستانی سفارت خانے کے حکام نے انہیں رخصت کیا۔
