وزیراعظم محمد شہباز شریف اور چیف آف ڈیفنس فورسز فیلڈ مارشل سید عاصم منیر نے مشترکہ طور پر ڈیٹا سینٹر سکائی 47 قراقرم۔01 کا افتتاح کیا، جو پاکستان کے ڈیجیٹل مستقبل کو بہتر بنائے گا۔

 اسلام آباد میں افتتاحی تقریب سے خطاب کرتے ہوئے وزیراعظم نے نئے قائم ہونے والے ڈیٹا سینٹر کو ایک شاندار کامیابی قرار دیا اور کہا کہ یہ پاکستان کی ٹیکنالوجی کے شعبے میں انقلاب لانے اور ڈیجیٹل مستقبل کی تعمیر میں اہم کردار ادا کرے گا۔

انہوں نے فیلڈ مارشل سید عاصم منیر کی قیادت اور اس منصوبے سے وابستہ تمام افراد کی کاوشوں کو سراہا۔

وزیراعظم نے کہا کہ اس منصوبے کی کامیاب تکمیل اس بات کا ثبوت ہے کہ عزم اور مشترکہ کوششوں سے پاکستان مشکلات پر قابو پا کر قومی اہداف حاصل کر سکتا ہے۔

انہوں نے یقین ظاہر کیا کہ ملک نہ صرف ماضی کے نقصانات کا ازالہ کرے گا بلکہ ایک متحرک، ترقی پسند اور بہتر مستقبل کی جانب بڑھنے والی قوم کے طور پر ابھرے گا۔

شہباز شریف نے کہا کہ ڈیٹا سینٹر جیسے منصوبے پاکستان کا مستقبل ہیں، اور تمام ریاستی اداروں کو اس سہولت سے منسلک ہونا چاہیے تاکہ اس کی صلاحیتوں سے بھرپور فائدہ اٹھایا جا سکے۔

وزیراعظم نے زیڈ ٹی ای، وزارتِ انفارمیشن ٹیکنالوجی اور ٹیلی کمیونی کیشن اور دیگر تمام متعلقہ اداروں کا بھی شکریہ ادا کیا جنہوں نے اس منصوبے کی کامیاب تکمیل میں تعاون کیا۔

انہوں نے بتایا کہ اس ڈیٹا سینٹر کی گنجائش آٹھ اعشاریہ پانچ میگاواٹ ہے، اور ملک کے ڈیجیٹل انفراسٹرکچر کو مزید مضبوط بنانے کے لیے اسی نوعیت کے ڈیٹا سینٹر کراچی اور لاہور میں بھی قائم کیے جائیں گے۔

سکائی 47 پاکستان کا سب سے بڑا ڈیٹا سینٹر اور مصنوعی ذہانت کاڈیجیٹل انفراسٹرکچر پلیٹ فارم ہے۔

اسے عالمی معیار کے مطابق خاص مقصد کیلئے بنایا گیا ہے اور اسے کام میں اضافے کے مسئلے سے نمٹنے اور اعلیٰ کارکردگی کا کمپیوٹنگ انفراسٹرکچر فراہم کرنے کے لیے ڈیزائن کیا گیا ہے جو ملک کے اندر مصنوعی ذہانت کے کام کو درستی سے کرنے کی صلاحیت کا حامل ہے۔

یہ سہولت ہر سطح پر خودمختار کلاوڈ آرکیٹیکچر اور صنعتی سطح کی سکیورٹی کی خصوصیات رکھتی ہے اور اس بات کو یقینی بناتی ہے کہ پاکستان کے اہم ڈیٹا کی ملک کے اندر محفوظ طریقے سے ہوسٹنگ کی جائے۔

ڈیٹا سینٹر پاکستان کی ڈیجیٹل خودمختاری کو تقویت دے گا، قومی استحکام میں اضافہ کرے گا، اور ملک میں ڈیجیٹل انقلاب کو تیز کرے گا۔