وزیر پیٹرولیم علی پرویز ملک نے ایندھن کی بلا تعطل فراہمی یقینی بنانے کے لیے پیشگی انتظامات کرنے کی ہدایت کی ہے۔
انہوں نے یہ بات پیٹرولیم مصنوعات کی بلا تعطل فراہمی اور وزیراعظم کی فیول ریلیف اسکیم پر عملدرآمد یقینی بنانے کے حوالے سے اسلام آباد میں منعقدہ ایک اجلاس کی صدارت کرتے ہوئے کہی۔
وزیرِ پیٹرولیم نے کہا کہ سڑکوں کی بندش کی صورت میں پیٹرولیم مصنوعات کی ترسیل متاثر نہیں ہونی چاہیے۔
ریلوے کے ایڈیشنل سیکرٹری نے یقین دہانی کرائی کہ پاکستان ریلویز راستوں کی بندش کی صورت میں ڈیزل کی ترسیل خصوصاً خیبرپختونخوا کو ایندھن کی فراہمی کے لیے زیادہ سے زیادہ ٹرینیں دستیاب رکھے گا۔
پاکستان اسٹیٹ آئل کو پیشگی منصوبہ بندی کے ذریعے فیول کی وافر مقدار ذخیرہ کرنے کی ہدایت کی گئی۔
اوگرا نے ایندھن کی بلاتعطل فراہمی یقینی بنانے کے لیے ایک خصوصی کنٹرول روم بھی قائم کیا ہے۔
