سندھ حکومت اور اقوام متحدہ کے صنعتی ترقی کے ادارے نے صوبے میں ترقیاتی منصوبوں کیلئے چار کروڑ ڈالر متحرک کرنے پر اتفاق کیا ہے۔
یہ اتفاق آج کراچی میں وزیراعلیٰ سندھ سید مراد علی شاہ اور اقوام متحدہ کے صنعتی ترقی کے ادارے کے ایک وفد کے درمیان ملاقات میں ہوا۔
وفد کی قیادت ڈپٹی ڈائریکٹر جنرل فاتو حیدرا کر رہی تھیں۔
ملاقات میں موسمیاتی تبدیلیوں کے اثرات سے محفوظ بنیادی ڈھانچے، دیہی ترقی، جامع اقتصادی ترقی اور روزگار کے مواقع پیدا کرنے کے شعبوں میں تعاون پر بھی تبادلہ خیال کیا گیا۔
وزیراعلیٰ نے دو ہزار بائیس کے تباہ کن سیلاب سے متاثرہ دیہی آبادیوں کی بحالی میں اقوام متحدہ کے صنعتی ترقی کے ادارے کے کردار کو سراہا۔
