وزیراعظم محمد شہباز شریف نے ہدایت کی ہے کہ قومی اہمیت کے تمام ترقیاتی منصوبوں کو مقررہ مدت کے اندر اعلیٰ معیار کے ساتھ مکمل کیا جائے۔
وہ وزیر منصوبہ بندی و ترقی احسن اقبال سے گفتگو کر رہے تھے، جنہوں نے آج اسلام آباد میں ان سے ملاقات کی۔
وزیراعظم نے کہا کہ عوامی فلاح و بہبود، روزگار کے مواقع پیدا کرنے اور پائیدار معاشی ترقی کے حصول کیلئے ترقیاتی منصوبوں کی بروقت تکمیل حکومت کی اولین ترجیح ہے۔
انہوں نے اس امر پر بھی زور دیا کہ تمام متعلقہ وزارتیں اور ادارے باہمی تعاون اور مؤثر رابطے کے ذریعے منصوبوں پر عملدرآمد کی رفتار مزید تیز کریں، تاکہ عوام کو جلد از جلد ان کے ثمرات پہنچ سکیں۔
وزیر منصوبہ بندی نے وزیراعظم کو جاری ترقیاتی منصوبوں، ان پر ہونے والی پیشرفت اور مستقبل کے لائحہ عمل سے آگاہ کیا۔
ملاقات میں پبلک سیکٹر ڈیویلپمنٹ پروگرام کے تحت منصوبوں کی پیشرفت پر تفصیلی تبادلہ خیال کیا گیا۔
