وزیراعظم شہبازشریف نے یقین ظاہرکیا ہے کہ ریکوڈک جیسے بڑے منصوبوں سے بلوچستان کے عوام کے لیے روزگار، ہنرمندی کے فروغ اور معاشی ترقی کے نئے مواقع پیدا ہوں گے۔
وہ آج اسلام آباد میں بیرک مائننگ کارپوریشن کے چیئرمین جان تھورنٹن کی قیادت میں وفد سے گفتگو کر رہے تھے۔
وزیراعظم نے کہا کہ پاکستان اپنے وسیع معدنی وسائل کو بروئے کار لانے اور عالمی سرمایہ کاری کے لیے نئے مواقع پیدا کرنے کے لیے پرعزم ہے۔
ملاقات کے دوران پاکستان میں معدنی شعبے کی ترقی کے لیے موزوں پالیسی، ریگولیٹری اور بنیادی ڈھانچے کے نظام پر بھی تبادلہ خیال کیا گیا۔
وفد نے وزیرِ اعظم اور حکومت پاکستان کی جانب سے پاکستان منرلز انوسٹمنٹ فورم کے انعقاد کو سراہتے ہوئے اسے پاکستان میں معدنی ترقی کی جانب ایک اہم قدم قراردیا۔
وفد نے کراچی اور گوادر میں منرل پراسیسنگ کی صنعت کے قیام میں سرمایہ کاری کیلئے بھی گہری دلچسپی کا اظہار کیا۔
