وزیراعظم نے بین الاقوامی مالیاتی فنڈ کے ساتھ معاہدے کو قابل عمل بنانے میں مدد کے لئے سٹیٹ بینک آف پاکستان میں دو ارب ڈالر جمع کرانے پر سعودی قیادت کا شکریہ ادا کیا ہے۔
انہوں نے آج (منگل) کواسلام آباد میں سعودی عرب کے سفیر نواف بن سعید المالکی سے ملاقات کے دوران پاکستان کے لئے فراخدلانہ اور غیر متزلزل حمایت پر سعودی ولی عہد محمد بن سلمان کاخصوصی شکریہ ادا کیا۔
انہوں نے سفیر کو سعودی عرب سمیت خلیج تعاون کونسل کے رکن ملکوں کی طرف سے ممکنہ سرمایہ کاری کو آسان بنانے اور تیزرفتار ممکنہ سرمایہ کاری کیلئے خصوصی سرمایہ کاری سہولت کونسل کے قیام کے بارے میں بھی آگاہ کیا۔
اس موقع پر گفتگوکرتے ہوئے سعودی سفیر نواف بن سعید احمد المالکی نے کہا کہ پاکستان اور سعودی عرب باہمی اعتماد اور مفاہمت پر مبنی برادرانہ رشتوں میں بندھے ہوئے ہیں۔
