وزیر داخلہ محسن نقوی نے کہا ہے کہ منشیات کے تدارک میں خلیجی ممالک کے ساتھ تعاون بڑھانے کیلئے جلد ایک کانفرنس کا انعقاد کیا جائے گا۔
انہوں نے انسداد منشیات فورس کے ہیڈ کوارٹرز کے دورے کے دوران کہا کہ اس کانفرنس میں خلیجی ممالک کی انسداد منشیات فورسز کے سربراہان کو مدعو کیا جائے گا۔ محسن نقوی نے زور دیا کہ منشیات کیخلاف مشترکہ ایکشن پلان بنانے کیلئے یہ کانفرنس ناگزیر ہے۔ وزیر داخلہ نے کہا کہ منشیات سے نئی نسل کو محفوظ بنانے کیلئے پوری طاقت سے کارروائیاں کی جائیں گی۔انہوں نے تعلیمی اداروں میں منشیات کے استعمال کے خلاف بیداری مہم جاری رکھنے کی ہدایت کی۔ انہوں نے زور دیا کہ منشیات جیسے گھنائونے دھندے میں ملوث کسی کے ساتھ کوئی نرمی نہیں برتی جائے۔محسن نقوی نے گزشتہ سال دو ہزار ایک سو سے زائد کارروائیوں میں کوئی دس ارب ڈالرز مالیت کی منشیات پکڑنے کو سراہا۔
