منصوبہ بندی وترقی کے وزیراحسن اقبال نے کہاہے کہ اگرچہ چین پاکستان اقتصادی راہداری ایک دوطرفہ منصوبہ ہے تاہم اس سے خطے کے تمام ممالک کوفائدہ پہنچے گا۔چائنااکنامک نیٹ سے گفتگو کرتے ہوئے انہوں نے کہاکہ سی پیک سے نہ صرف پاکستان کوبلکہ دیگرملکوں کو بھی مختلف شعبوں میں ترقی کے مواقع میسرہوںگے۔منصوبہ بندی کے وزیرنے کہاکہ جنو ب مشرقی ایشیائی مشرقی وسطی اورافریقی ممالک بھی سی پیک کے ساتھ منسلک ہونے میں گہری دلچسپی رکھتے ہیں۔انہوں نے کہاکہ پاکستان میں سی پیک کے تحت جاری منصوبوں میں نمایاں پیشرفت ہورہی ہے جس سے ہمیں توانائی کے بحرا ن پرقابوپانے اوربنیادی ڈھانچے کو بہتربنانے میں کافی مددمل رہی ہے۔احسن اقبال نے کہاکہ ایک خطہ ایک شاہراہ سمیت علاقائی تعاون کے دیگرمنصوبوں کے تحت پاکستان، چین اوردیگرملکوں کے درمیان تجارت کے شاندارمواقع دستیاب ہوںگے۔