یوم شہدائے جموں کے موقع پر اپنے پیغام میں صدر آصف علی زرداری نے نومبر انیس سو سینتالیس میں جموں میں قتل عام کا نشانہ بننے والے بے گناہ کشمیری مسلمانوں کو خراج عقیدت پیش کیا ہے۔

انہوں نے کہا کہ ہم ان خاندانوں کے ساتھ یکجہتی کا اظہار کرتے ہیں جن کی زندگیاں تشدد اور نقل مکانی کے باعث تباہ ہو گئیں۔

صدر نے انسانی حقوق کی تنظیموں ایمنسٹی انٹرنیشنل اور ہیومن رائٹس واچ کی حالیہ رپورٹس کا حوالہ دیا جن میں بھارت کے غیر قانونی زیر قبضہ جموں و کشمیر میں من مانی گرفتاریوں، پرامن اختلاف رائے پر پابندیوں، سزا کے طور پر مکانات مسمار کرنے اور ذرائع ابلاغ کی آزادی دبانے کے اقدامات کو دستاویزی شکل دی گئی ہے۔

آصف علی زرداری نے کہا کہ بھارت میں ریاستی سرپرستی میں دائیں بازو کے سیاسی رہنماؤں اور انتہا پسند گروہوں کی جانب سے مسلمانوں و دیگر مذہبی اقلیتوں کے خلاف نفرت اور پاکستان دشمنی کے فروغ پر ہمیں گہری تشویش ہے۔