وزیراعظم شہباز شریف نے کیش لیس معیشت کے فروغ کے لیے ملک بھر میں انٹرنیٹ کی دستیابی اور عوام کو ٹیکنالوجی تک آسان رسائی یقینی بنانے کی ہدایت کی ہے۔

وہ اسلام آباد میں کیش لیس معیشت کے فروغ کے حوالے سے جائزہ اجلاس کی صدارت کر رہے تھے۔

وزیراعظم نے کہا کہ کیش لیس معیشت کا فروغ حکومت کی اولین ترجیحات میں شامل ہے اور اس کے مثبت نتائج سامنے آنا شروع ہو گئے ہیں۔

انہوں نے کیش لیس معیشت کے فروغ کے لیے وزارت خزانہ اور تمام متعلقہ سرکاری اداروں کی جاری کوششوں کو سراہا۔

شہباز شریف نے متعلقہ حکام کو ہدایت کی کہ ملک بھر میں سو فیصد ڈیجیٹل ادائیگیوں کا نظام قائم کرنے کے لیے مخصوص مدت اور اہداف پر مشتمل واضح لائحہ عمل پیش کیا جائے۔