اقوام متحدہ کے سیکرٹری جنرل انتونیو گوتریس نے وزیراعظم محمد شہباز شریف سے ٹیلی فون پر رابطہ کیا جس میں جنوبی ایشیا کی موجودہ سیکیورٹی صورتحال پر تبادلہ خیال کیا گیا۔
سیکرٹری جنرل نے وزیر اعظم کو خطے میں امن اور استحکام کے لئے ان کی کوششوں کے بارے میں آگاہ کیا اور اس معاملے پر تمام ثالثوں کے ساتھ رابطے میں رہنے کے عزم کا اظہار کیا۔
وزیراعظم نے اقوام متحدہ کے سیکرٹری جنرل کی مسلسل روابط کی کوششوں کو سراہا اور تنائو میں کمی کے لئے ان کے مطالبے کا خیرمقدم کیا۔
ایک آزاد، شفاف اور قابل اعتماد تحقیقات کی اپنی پیشکش کو دہراتے ہوئے وزیر اعظم نے تشویش کا اظہار کیا کہ بھارت نے ابھی تک پہلگام واقعہ کے کوئی ثبوت فراہم نہیں کئے لیکن وہ اشتعال انگیز بیانات اور جنگی جنون کا سلسلہ جاری رکھے ہوئے ہے۔
انہوں نے پاکستان کی خودمختاری اور علاقائی سالمیت کے دفاع کے عزم کا اعادہ کیا۔
وزیراعظم نے پاکستان کے معاشی مفادات کو نقصان پہنچانے کی کوشش میں بین الاقوامی مالیاتی اداروں کو سیاسی رنگ دینے کی بھارتی کوششوں پر اپنی شدید تشویش کا اظہار کیا۔
وزیر اعظم شہباز شریف اور اقوام متحدہ کے سیکرٹری جنرل کے درمیان ایک ہفتے کے اندر یہ دوسری ٹیلی فونک گفتگو تھی۔
