وزیر منصوبہ بندی احسن اقبال نے بیرون ملک مقیم پاکستانیوں پر زور دیا ہے کہ وہ پائیدار ترقی اور اقتصادی انقلاب کی جانب پاکستان کے سفر میں بھرپور انداز میں حصہ لیں۔
انہوں نے یہ بات آج فلوریڈا کے شہر اورلینڈو میں ایسوسی ایشن آف فزیشنز آف پاکستانی ڈیسنٹ آف نارتھ امریکہ کے انچاس ویں سالانہ کنونشن سے خطاب کرتے ہوئے کہی۔
وفاقی وزیر نے کہا کہ پاکستان کے مستقبل کا انحصارتعلیم، صحت کی دیکھ بھال، بہبود آبادی، جدت اور ٹیکنالوجی میں سرمایہ کاری اور بیرون ملک مقیم پاکستانی پروفیشنلز کے ساتھ شراکت داری کو مضبوط بنانے پر منحصر ہے۔
بیرون ملک مقیم پاکستانی ڈاکٹروں کو اپنی مہارت سے دوسروں کو فائدہ پہنچانے کی دعوت دیتے ہوئے انہوں نے ایک جدید ٹیلی میڈیسن بیک اپ ماڈل تجویز کیا جس کے تحت پاکستان کے ساٹھ اضلاع میں سے ہر ایک کے لیے امریکہ میں مقیم دس طبی ماہرین کا ایک پینل قائم کیا جائے گا۔
احسن اقبال نے مصنوعی ذہانت، ڈیجیٹل ٹیکنالوجیز، قابل تجدید توانائی اور موسمیاتی استحکام میں نئے پیدا ہونے والے مواقع پر بھی روشنی ڈالی۔
