سیاسی قیادت کو آگاہ کیا گیا ہے کہ پاکستان کی مسلح افواج بھارت کی کسی بھی فوجی مہم جوئی کی صورت میں ملک کی خودمختاری اور علاقائی سالمیت کے دفاع کے لئے پوری طرح تیار اور پرعزم ہیں۔
وفاقی وزیر اطلاعات و نشریات عطاء اللہ تارڑ اور پاک فوج کے شعبہ تعلقات عامہ کے ڈائریکٹر جنرل لیفٹیننٹ جنرل احمد شریف نے اسلام آباد میں ایک بریفنگ سیشن میں کہا کہ پاکستان امن پسند ملک ہے اور خطے میں امن چاہتا ہے۔
ڈی جی آئی ایس پی آر لیفٹیننٹ جنرل احمد شریف نے اجلاس کے شرکاء کو مسلح افواج کی آپریشنل تیاریوں کے بارے میں بریفنگ دی۔
وزیر اطلاعات نے سیاسی جماعتوں کے نمائندوں کو حکومت کی جانب سے تمام سطحوں پر کی جانے والی سفارتی کوششوں اور پہلگام واقعہ کے تناظر میں پاکستان کے موقف اور بھارت کی طرف سے اٹھائے گئے یکطرفہ اقدامات سے آگاہ کیا۔
