پاکستان نے تازہ ترین علاقائی صورتحال پر اقوام متحدہ کی سلامتی کونسل کو باضابطہ طور پر بریفنگ دینے کا فیصلہ کیا ہے۔

اس تناظر میں نائب وزیر اعظم محمد اسحاق ڈار نے اقوام متحدہ میں پاکستان کے مستقل نمائندے کو ہدایت کی ہے کہ وہ اقوام متحدہ کی سلامتی کونسل کا اجلاس بلانے کے لیے فوری اقدامات کریں۔

پاکستان اقوام متحدہ کی سلامتی کونسل کو بھارت کے جارحانہ اقدامات، اشتعال انگیزی اور اشتعال انگیز بیانات سے آگاہ کرے گا، جس میں خاص طور پر سندھ طاس معاہدے کو معطل کرنے کیلئے بھارت کے غیر قانونی اقدامات کو اجاگرکیا جائے گا۔

اس کے علاوہ پاکستان یہ واضح کرے گا کہ کس طرح ہندوستان کے جارحانہ اقدامات جنوبی ایشیا اور خطے کے امن و سلامتی کو خطرے میں ڈال رہے ہیں۔

یہ اہم سفارتی اقدام عالمی برادری کے سامنے درست حقائق پیش کرنے کی پاکستان کی کوششوں کا حصہ ہے۔