چین کے صدر شی جن پنگ نے پاکستان کے ساتھ متعدد شعبوں میں تعاون کے فروغ اور عوام کے درمیان روابط بڑھانے کی خواہش کا اظہار کیا ہے۔

وزیراعظم شہباز شریف کو اُن کی سالگرہ کے موقع پر اپنے تہنیتی خط میں انہوں نے کہا کہ چین اور پاکستان کے تعلقات کو مستحکم کرنا اُن کیلئے انتہائی اہمیت کا حامل ہے۔چینی صدر نے کہا پاکستان اور چین اچھے بُرے وقتوں میں تزویراتی تعاون کے شراکت دار ہیں، تاریخ اس بات کی گواہ ہے کہ دونوں ملکوں نے ہمیشہ ایک دوسرے پر بھروسہ اور ایک دوسرے کی حمایت کی ہے۔انہوں نے اس بات پر زور دیا کہ عالمی منظرنامہ تبدیل ہونے کے باوجود اس پائیدار تعلق پر کوئی اثرات مرتب نہیں ہوئے۔انہوں نے تزویراتی تعاون کے فروغ اور چین پاکستان اقتصادی راہداری کی تعمیر میں پیشرفت کیلئے وزیراعظم شہباز شریف کے ساتھ ملکر کام کرنے کی خواہش ظاہر کی۔