نوجوان کمپیئرز، ریڈیو جاکیز، نیوز ریڈرز اور انٹرنز کے لیے پیشہ ورانہ نشریات کے موضوع پر دو روزہ تربیتی ورکشاپ آج پاکستان براڈکاسٹنگ کارپوریشن ملتان میں شروع ہوئی۔

یہ ورکشاپ وزیر اطلاعات و نشریات عطا اللہ تارڑ کے ملک بھر میں نوجوانوں کی صلاحیتوں کو بڑھانے کے اقدام کا حصہ ہے۔

وزیر اطلاعات کے وژن کے مطابق ریڈیو پاکستان ملک بھر میں اپنے اسٹیشنز پر پیشہ ورانہ تربیتی پروگراموں کا سلسلہ منعقد کر رہا ہے، تاکہ نوجوانوں کو نشریات کے عملی تجربات فراہم کیے جا سکیں اور انہیں ابلاغ کی جدید مہارتوں سے آراستہ کیا جا سکے۔

اس اقدام کا مقصد پی بی سی اسٹیشنز کو ابھرتے ہوئے ٹیلنٹ کی شناخت، تربیت اور رہنمائی کے پلیٹ فارم کے طور پر استعمال کرنا ہے، جس میں پیشہ ورانہ معیار، ذمہ دارانہ ابلاغ اور جدید نشریاتی تکنیکوں پر خصوصی توجہ دی جا رہی ہے۔

پاکستان براڈکاسٹنگ کارپوریشن کے ڈائریکٹر جنرل سعید احمد شیخ نے پیشہ ورانہ ترقی اور جدید تکنیکوں کے عنوان سے ورکشاپ کی افتتاحی نشست سے ویڈیو لنک کے ذریعے خطاب کرتے ہوئے کہا کہ ریڈیو پاکستان نے نوجوانوں کی صلاحیتوں سے فائدہ اٹھانے اور انہیں جدید میڈیا کی بدلتی ہوئی ضروریات کے لیے تیار کرنے کے لیے ملک بھر میں تربیتی پروگراموں کا سلسلہ شروع کیا ہے۔

انہوں نے کہا کہ وزیر اطلاعات و نشریات کے وژن کے مطابق شروع کیے گئے اس اقدام سے جنریشن زی کی ابلاغی مہارتوں، اعتماد اور فکری صلاحیتوں کو بہتر بنانے میں مدد ملے گی۔

ڈائریکٹر جنرل نے کہا کہ ریڈیو پاکستان نے ہمیشہ ٹیلنٹ تلاش کرنے اور اسے پروان چڑھانے میں اہم کردار ادا کیا ہے اور کئی ایسی شخصیات متعارف کرائی ہیں جنہوں نے بعد میں ٹیلی ویژن، فلم اور دیگر شعبوں میں نمایاں مقام حاصل کیا۔

سعید احمد شیخ نے کہا کہ تربیتی ورکشاپس کے نئے سلسلے کا مقصد اس روایت کو دوبارہ بحال کرنا ہے تاکہ ملک بھر کے نوجوان براڈکاسٹرز کو ریڈیو پاکستان کے پیشہ ورانہ پلیٹ فارمز پر اپنی صلاحیتوں کے اظہار کے مواقع فراہم کیے جا سکیں۔

دو روزہ ورکشاپ کے دوران شرکاء کو پیشہ ورانہ نشریات، پریزنٹیشن، آواز کے اتار چڑھاؤ، نیوز ریڈنگ، ریڈیو جاکینگ اور موثر اور ذمہ دارانہ ابلاغ کی عملی تربیت دی جا رہی ہے۔

یہ تربیتی پروگرام پی بی سی کے ماہر براڈکاسٹرز تیار کرنے کی وسیع کوششوں کا حصہ ہے جس کے تحت نوجوانوں کو تجربہ کار میڈیا ماہرین سے براہ راست سیکھنے کے مواقع فراہم کیے جا رہے ہیں۔