وزیراعظم شہباز شریف نے کہا ہے کہ پاکستان دنیا کو ہر ایک کیلئے زیادہ پُرامن اور متحد بنانے کیلئے عالمی برادری کے ساتھ مل کر کام کرنے کیلئے تیار ہے۔
عالمی یوم امن کے موقع پر اپنے پیغام میں انہوں نے کہا کہ پاکستان بات چیت کے ذریعے خطے میں امن و استحکام کو مضبوط کرنے پر پختہ یقین رکھتا ہے اور اس مقصد کے حصول کیلئے دیرینہ تنازعات کو موثر انداز میں حل کرنا ضروری ہے۔
شہباز شریف نے کہا کہ خطے کا پائیدار امن کا انحصار غیر جانبدارانہ رائے شماری اور اقوام متحدہ کی سلامتی کونسل کی قراردادوں کے مطابق جموں و کشمیر کے مسئلے کو پُرامن انداز میں منصفانہ انداز میں حل کرنے میں ہے۔
انہوں نے کہا کہ ہمیں فلسطین کے بے گناہ عوام کی حالت زار کو بھی نظر انداز نہیں کرنا چاہئے جو بہادری سے جارحیت کا سامنا کر رہے ہیں۔
مشرق وسطیٰ میں پائیدار امن کے حوالے سے وزیراعظم نے کہا کہ اقوام متحدہ کی قراردادوں اور فلسطینی عوام کی خواہشات کے مطابق اس مسئلے کا پُرامن حل وقت کا تقاضا ہے۔
