صدر آصف علی زرداری اور وزیراعظم محمد شہباز شریف نے ان 22 کشمیریوں کو خراجِ عقیدت پیش کیا ہے جنہوں نے 1931 میں سرینگر میں ڈوگرہ فوج کی فائرنگ کا بہادری سے مقابلہ کرتے ہوئے اپنی جانوں کا نذرانہ پیش کیا۔

آج یومِ شہدائے کشمیر پر اپنے الگ الگ پیغامات میں انہوں نے کہا کہ پاکستان کے عوام شہداء کی قربانیوں کی یاد میں اپنے کشمیری بھائیوں کے ساتھ شریک ہیں۔

صدر نے عالمی برادری پر زور دیا کہ وہ اقوامِ متحدہ کی قراردادوں کے مطابق تنازعۂ کشمیر کے پُرامن حل کی کوششوں کی حمایت میں اپنا فعال کردار ادا کرے۔

وزیراعظم نے کہا کہ تنازعۂ کشمیر کے پُرامن حل تک جنوبی ایشیا میں پائیدار امن اور استحکام کا حصول ممکن نہیں ہے۔

انہوں نے جموں و کشمیر کے عوام کے لیے پاکستان کی غیر متزلزل سیاسی، سفارتی اور اخلاقی حمایت کا اعادہ کیا۔