میرپور میں کشمیر پریمیئر لیگ کے زیر اہتمام فٹبال ٹورنامنٹ 2026 کا شاندار انعقاد ہونے جا رہا ہے، جس کا مقصد کھیلوں کے فروغ کے ساتھ ساتھ امن، محبت، بھائی چارے، باہمی ہم آہنگی اور یکجہتی کے پیغام کو اجاگر کرنا ہے۔

تین روزہ فٹبال ٹورنامنٹ 8 سے 10 اکتوبر تک میرپور میں جاری رہے گا، جس میں خطے کے مختلف شہروں اور علاقوں کی نمائندگی کرنے والی چھ ٹیمیں حصہ لیں گی۔

ٹورنامنٹ میں میرپور واریئرز، مظفرآباد ٹائٹنز، پونچھ چیمپئنز، لداخ لیجنڈز، سری نگر اسٹرائیکرز اور جموں چیلنجرز کی ٹیمیں ایکشن میں ہوں گی اور شائقین فٹبال کو سنسنی خیز اور دلچسپ مقابلے دیکھنے کو ملیں گے۔

ٹورنامنٹ کے دوران مختلف ٹیموں کے مابین مقابلوں کا سلسلہ جاری رہے گا جبکہ 10 اکتوبر کو فائنل کھیلا جائے گا، جس کے بعد ٹورنامنٹ کی فاتح ٹیم کا فیصلہ ہوگا۔

کشمیر پریمیئر لیگ اور میرپور یونیورسٹی آف سائینس اینڈ ٹیکنالوجی (MUST) کے زیرِ اہتمام اس فٹبال ٹورنامنٹ کو محض کھیلوں کا مقابلہ نہیں بلکہ کھیل کے ذریعے امن، محبت، بھائی چارے اور یکجہتی کو فروغ دینے کی ایک مثبت کاوش قرار دیا جا رہا ہے۔

اس موقع پر کھیل کے جذبے کو اجاگر کرنے اور امن و محبت کا پیغام عام کرنے کے لیے ایک خصوصی گانا بھی ریلیز کیا گیا ہے۔ گانے کی پروڈکشن ریڈیو پاکستان نے کی ہے، جو ٹورنامنٹ کے پیغام اور جذبے کی بھرپور عکاسی کرتا ہے۔

منتظمین کے مطابق کھیل مختلف معاشروں اور خطوں کے درمیان فاصلے کم کرنے، نوجوانوں کو مثبت سرگرمیوں کی جانب راغب کرنے اور باہمی تعلقات کو مضبوط بنانے کا مؤثر ذریعہ ہے۔ کشمیر پریمیئر لیگ کا یہ فٹبال ٹورنامنٹ بھی اسی سوچ کے تحت منعقد کیا جا رہا ہے تاکہ کھیل کے میدان سے امن، محبت، بھائی چارے اور یکجہتی کا پیغام عام کیا جا سکے۔

میرپور میں ہونے والے ان مقابلوں سے جہاں فٹبال کے شائقین کو معیاری اور سنسنی خیز کھیل دیکھنے کا موقع ملے گا، وہیں نوجوان کھلاڑیوں کو اپنی صلاحیتوں کے اظہار اور کھیل کے میدان میں آگے بڑھنے کے نئے مواقع بھی میسر آئیں گے۔

کشمیر پریمیئر لیگ کے اس اقدام کو خطے میں کھیلوں کے فروغ اور نوجوان نسل کو صحت مند اور مثبت سرگرمیوں سے جوڑنے کی جانب ایک اہم قدم قرار دیا جا رہا ہے۔