وزیر پیٹرولیم علی پرویز ملک نے کہا ہے کہ وفاقی حکومت نے مقبول فیصلے کرنے کے بجائے ملک کے زرمبادلہ کے ذخائر کے تحفظ کو ترجیح دی ہے۔
انہوں نے آج لاہور میں ایک تقریب سے خطاب کرتے ہوئے کہا کہ پیٹرولیم مصنوعات کی بڑھتی ہوئی قیمتوں کے اثرات کم کرنے کی غرض سے مخصوص طبقوں کیلئے سبسڈی متعارف کرائی گئی ہے۔
انہوں نے کہا کہ عالمی منڈی میں پیٹرولیم مصنوعات کی قیمتوں میں کمی آتے ہی حکومت صارفین کو ریلیف فراہم کرے گی۔
وزیر پیٹرولیم نے کہا کہ ایران اور امریکہ کے درمیان کشیدگی سے عالمی منڈی میں پیٹرولیم مصنوعات کی قیمتیں متاثر ہوئیں۔
انہوں نے کہاکہ توانائی کی بچت کیلئے معمولی اقدامات بھی قیمتی زرمبادلہ بچانے میں مددگار ثابت ہو سکتے ہیں۔
علی پرویز ملک نے توانائی کی بچت کے رجحان کو فروغ دینے کی ضرورت پر زور دیتے ہوئے عوام سے اپیل کی کہ وہ موسم سرما کے دوران توانائی کا غیر ضروری استعمال نہ کریں۔
