چترال میں کیلاش قبیلے کا تین روزہ قدیم مذہبی اور ثقافتی تہوار ''چلم جوشی'' اپنی تمام تر رنگینیوں اور عقیدت کے ساتھ ختم ہو گیا ہے۔

چلم جوشی تہوار وادی کیلاش کی تہذیب، خوشی، ہم آہنگی اور فطرت سے محبت کی علامت بن چکا ہے، جو ہر سال ہزاروں لوگوں کو اپنی طرف متوجہ کرتا ہے۔

سالانہ چلم جوشی فیسٹیول وادی کالاش کی تینوں خوبصورت وادیوں رمبور، بمبوریت اور بریر میں منایا گیا۔

تہوار کا آغاز رمبور وادی میں رسم ورواج سے ہوا، دوسرے مرحلہ میں یہ میلہ وادی بمبوریت میں منایا گیا۔

آخری مرحلہ میں بریر وادی میں یہ خوبصورت تہوار اپنی رعنایوں کے ساتھ اختتام پذیر ہو گیا۔

تہوار کو دیکھنے کے لئے 170 سے زائد غیر ملکی سیاحوں نے وادی کیلاش کا رخ کیا۔ ان میں فرانس، جرمنی، امریکہ، آسٹریلیا، اٹلی، سوئٹزرلینڈ، روس، جاپان، چین، یونان، تائیوان، جنوبی کوریا، انگلینڈ، ہالینڈ، ملائیشیا، انڈونیشیا اور رومانیہ سے تعلق رکھنے والے سیاح شامل ہیں۔