نائب وزیراعظم اسحاق ڈار نے اسلامی تعاون تنظیم کو مسلم امہ کی متحد اور موثر آواز بنانے کے عزم کا اعادہ کیا ہے۔

وہ آج اسلام آباد میں ای سی او وزرائے خارجہ کونسل کے تیسویں اجلاس کے موقع پر او آئی سی کے سیکرٹری جنرل اسماعیل اولد شیخ احمد سے گفتگو کر رہے تھے۔

اسحاق ڈار نے عہدہ سنبھالنے کے بعد پہلی بار اسلام آباد آمد پر او آئی سی کے سیکرٹری جنرل کا خیرمقدم کیا اور انہیں تنظیم کے مقاصد کے فروغ کے لیے پاکستان کی مسلسل حمایت اور تعاون کا یقین دلایا۔

فریقین نے او آئی سی کے تحت قریبی تعاون جاری رکھنے پر اتفاق کیا اور فلسطین اور جموں و کشمیر کے عوام کی حمایت اور حق خودارادیت کے حصول کے لیے اپنے غیرمتزلزل عزم کا اعادہ کیا۔