وزیر اعظم شہباز شریف نے کویت کی حکومت اور برادر عوام کو ان کے قومی دن اور یوم آزادی پر مبارکباد دی ہے۔
اپنے پیغام میں وزیراعظم نے اس پرمسرت موقع پر کویت کے امیر شیخ مشعل الاحمد الجابر الصباح اور وزیراعظم شیخ احمد عبداللہ الاحمد الصباح کو پرتپاک مبارکباد پیش کی۔
انہوں نے کہا کہ پاکستان غیر ملکی جارحیت کے خلاف اپنی آزادی کے تحفظ کے لیے مشکل وقت میں کویتی قوم کے ساتھ ان کی قابل فخر تاریخ اور ان کی جرات اور بہادری کا جشن منانے میں شامل ہے۔
شہباز شریف نے کہا کہ پاکستان اور کویت کے دوطرفہ تعلقات ہماری مشترکہ تاریخ، عقیدے اور ثقافت میں جڑے ہوئے ہیں۔
انہوں نے کہا کہ دونوں قومیں ہمیشہ ایک دوسرے کے ساتھ کھڑی رہی ہیں۔
وزیراعظم نے کہا کہ وہ دوطرفہ تعلقات کو نئی بلندیوں تک پہنچانے، باہمی فائدہ مند تعاون بڑھانے اور علاقائی امن و خوشحالی کے لیے کویت کی قیادت کے ساتھ مل کر کام کرنے کے منتظر ہیں۔
