وزیراعظم شہباز شریف نے فیڈرل بورڈ آف ریونیو میں اصلاحات کاعمل تیز کرنے کی ہدایت کی ہے۔
انہوں نے یہ بات اسلام آباد میں فیڈرل بورڈ آف ریونیو کے حوالے سے ایک اجلاس کی صدارت کرتے ہوئے کہی۔
وزیراعظم نے کہا کہ ایف بی آر میں جاری اصلاحات کے ابتدائی نتائج حوصلہ افزا ء ہیں۔
انہوں نے ٹیکنالوجی کے استعمال، موثر تربیت، شفافیت اوراحتساب پر خصوصی توجہ دیتے ہوئے ٹیکس خسارہ کم کرنے کیلئے ایف بی آر کی استعدادِ کار مسلسل بہتر بنانے کی ضرورت پر زور دیا۔
انہوں نے ٹیکس وصولی کے شعبوں میں خود کار نظام پر عملدرآمد تیز کرنے کی بھی ہدایت کی۔
شہباز شریف نے کہا ایف بی آر کے افسران کو قوم کی توقعات کے مطابق اپنی کارکردگی بہتر بنانی چاہیے۔
وزیراعظم نے ایف بی آر میں بدعنوان عناصر کیخلاف بلا امتیاز کارروائی کرنے کی بھی ہدایت کی۔
