ترجمان دفتر خارجہ سجاد حیدر خان نے کہا ہے کہ بھارت کا کوئی بھی یکطرفہ اقدام جموں و کشمیر کی بین الاقوامی طور پر تسلیم شدہ متنازع حیثیت کو تبدیل نہیں کر سکتا۔
وہ آج اسلام آباد میں ہفتہ وار میڈیا بریفنگ کے دوران ایک سوال کا جواب دے رہے تھے۔
ترجمان نے جموں و کشمیر کے متنازع علاقے میں مقامات کے نام تبدیل کرنے اور انہیں سیاسی نقشے میں بھارتی علاقے کے طور پر ظاہر کرنے کی بھارت کی تازہ کوشش کو مسترد کر دیا۔
انہوں نے کہا کہ ایسے غیر قانونی اقدامات جموں و کشمیر پر بھارت کے قبضے کو قانونی حیثیت نہیں دے سکتے۔
ترجمان نے اس امر پر زور دیا کہ تنازعِ کشمیر کو اقوام متحدہ کی سلامتی کونسل کی متعلقہ قراردادوں اور کشمیری عوام کی خواہشات کے مطابق، اقوام متحدہ کی نگرانی میں آزادانہ، منصفانہ اور غیر جانبدارانہ استصوابِ رائے کے ذریعے حل کیا جائے۔
سعودی عرب میں مقدس مقامات پر حوثی ملیشیا کے حملوں سے متعلق ایک سوال کے جواب میں ترجمان نے اعادہ کیا کہ پاکستان سعودی عرب کے ساتھ غیر متزلزل یکجہتی کا اظہار کرتا ہے۔
انہوں نے کہا کہ پاکستان مکہ مشترکہ دفاعی معاہدے کے تحت سعودی عرب کی خودمختاری، علاقائی سالمیت اور سلامتی کے تحفظ کے لیے پرعزم ہے۔
ایک اور سوال کے جواب میں سجاد حیدر خان نے کہا کہ پاکستان غزہ امن عمل اور اقوام متحدہ کی سلامتی کونسل کی متعلقہ قرارداد پر مکمل عمل درآمد پر زور دیتا ہے۔
