غذائی تحفظ کے وفاقی وزیر رانا تنویر حسین نے پاسکو کو ہدایت کی ہے کہ گندم کی نئی فصل آنے سے پہلے کسی بھی بحران سے بچاؤ کیلئے ذخیروں میں موجود گندم کی فروخت کو یقینی بنایا جائے۔
پاسکو ہیڈ آفس لاہور میں ایک اجلاس کی صدارت کرتے ہوئے انہوں نے کہا کہ اگر ذخیرہ شدہ گندم کو بروقت فروخت نہ کیا گیا تو اس کی کوالٹی متاثر ہوسکتی ہے جس کے نتیجے میں قومی خزانے کو ممکنہ طور پر بھاری نقصان پہنچ سکتا ہے۔
رانا تنویر حسین نے کہا کہ گندم کی فروخت کے عمل میں کسی قسم کی کوتاہی برداشت نہیں کی جائیگی۔
وفاقی وزیر نے زرعی پیداوار اور غذائی تحفظ یقینی بنانے کا حکومتی عزم ظاہر کیا۔
انہوں نے کہا کہ زرعی شعبے کی ترقی' کسانوں کی فلاح و بہبود اور ملک میں تحفظ خوراک کو یقینی بنانے کیلئے متعدد اقدامات کئے جارہے ہیں۔
