وزیراعظم محمد شہباز شریف نے جنوبی ایشیا کی موجودہ صورتحال میں پاکستان کی بھرپور حمایت پر ترک صدر رجب طیب اردوان کا شکریہ ادا کیا ہے۔
ہفتہ کے روز اسلام آباد میں پاکستان میں ترکیہ کے سفیر ڈاکٹر عرفان نیزیروگلو سے گفتگو کرتے ہوئے شہبازشریف نے کہا کہ پاکستان کیلئے ترکیہ کی حمایت دونوں ممالک اور ان کے عوام کے درمیان تاریخی آزمودہ اور گہرے برادرانہ تعلقات کی عکاس ہے۔
وزیراعظم نے کہا کہ پہلگام واقعہ کے بعد ہندوستان کی اشتعال انگیز کارروائیوں کے باوجود پاکستان کا ردعمل ذمہ دارانہ رہا ہے۔
انہوں نے اس امر کا اعادہ کیا کہ پاکستان نے ہمیشہ ہر قسم کی دہشت گردی کی مذمت کی ہے۔
وزیر اعظم نے کہا کہ بھارت پہلگام واقعہ میں پاکستان کے ملوث ہونے کا کسی بھی قسم کا ثبوت دینے میں ناکام رہا ہے اور وہ پاکستان کو پہلگام واقعہ سے جوڑنے کی سازش کر رہا ہے۔
انہوں نے مزید کہا کہ بھارت نے ابھی تک پہلگام واقعہ کے پس پردہ حقائق کا پتہ لگانے کیلئے قابل اعتماد، شفاف اور غیر جانبدار بین الاقوامی تحقیقات کی پاکستان کی پیشکش کا جواب نہیں دیا۔
ان کا کہنا تھا کہ پاکستان ایسی تحقیقات میں مکمل تعاون کرے گا اور اگر ترکیہ اس میں شامل ہوتا ہے تو اس کا خیرمقدم کیا جائے گا۔
وزیراعظم نے اس بات کا اعادہ کیا کہ پاکستان اس وقت اپنی اقتصادی بحالی اور ترقی پر مکمل توجہ مرکوز کئے ہوئے ہے، جس کیلئے اسے اپنے پڑوس میں امن اور سلامتی کی ضرورت ہے۔
اس موقع پر ترک سفیر نے وزیر اعظم کو بتایا کہ ترکیہ پاکستان کے موقف کا حامی ہے۔ انہوں نے پاکستان کے ساتھ اپنی یکجہتی کا اظہار بھی کیا۔
