وزیرِ خزانہ محمد اورنگزیب اور گورنر اسٹیٹ بینک آف پاکستان نے تھائی لینڈ کے شہر بنکاک میں ورلڈ بینک گروپ اور آئی ایم ایف کے سالانہ اجلاسوں کے موقع پر فچ ریٹنگز (Fitch Ratings) کے نمائندوں سے ملاقات کی، جس میں پاکستان کی معاشی کارکردگی اور خودمختار کریڈٹ ریٹنگ سے متعلق امور پر تبادلہ خیال کیا گیا۔
وزیرِ خزانہ نے پاکستان کی بین الاقوامی سرمایہ منڈیوں تک بحال شدہ رسائی، مالیاتی استحکام اور مسلسل بنیادی مالیاتی سرپلسز کو اجاگر کیا۔
انہوں نے مہنگائی کے رجحانات، مانیٹری پالیسی، شرحِ مبادلہ کے استحکام اور جاری کھاتے کے محدود خسارے سے متعلق صورتحال بھی بیان کی۔
بات چیت میں زرمبادلہ کے ذخائر میں اضافے، مستقبل میں واجب الادا ادائیگیوں سے متعلق ذمہ داریوں میں کمی اور بیرونی مالیاتی تحفظات مضبوط ہونے پر بھی گفتگو ہوئی، جس سے پاکستان کی بیرونی معاشی دبائو اور غیر متوقع حالات کا مقابلہ کرنے کی صلاحیت میں بہتری آئی ہے۔
پاکستانی وفد نے قرضوں کی ادائیگی کی صلاحیت میں بہتری، قرضوں پر سودی اخراجات میں کمی، قرض لینے کی مدت میں اضافے اور دوطرفہ قرضوں کی مدت میں توسیع سے متعلق یقین دہانیوں کو بھی اجاگر کیا۔
وفد نے آئی ایم ایف پروگرام کی تکمیل، ساختی اصلاحات پر عملدرآمد اور برآمدات پر مبنی ترقی کے فروغ کے عزم کا بھی اعادہ کیا۔
اس موقع پر وزیرِ خزانہ نے امریکہ کے ساتھ تجارت اور سرمایہ کاری سے متعلق روابط پر بھی گفتگو کی اور فچ ریٹنگز (Fitch Ratings) سے ڈبلـبی کریڈٹ ریٹنگ کے درجے تک پہنچنے کیلئے درکار شرائط کے بارے میں رائے طلب کی۔
