بری فوج کے سربراہ جنرل سید عاصم منیر جو سعودی عرب کے سرکاری دورے پر ہیں نے ریاض میں سعودی ولی عہد اور وزیر اعظم محمد بن سلمان سے ملاقات کی۔

انہوں نے علاقائی امن، دفاع اور سیکورٹی کے شعبوں میں تعاون اور دوطرفہ تعلقات کو بڑھانے کی حکمت عملی سمیت باہمی دلچسپی کے متعدد امور پر جامع بات چیت کی۔

آرمی چیف نے پاکستان کے لیے مستقل حمایت پر ولی عہد کا شکریہ ادا کیا اور خطے میں امن و استحکام کے لیے ان کے اہم کردار کو سراہا۔

انہوں نے سعودی وزیر دفاع شہزادہ خالد بن سلمان سے بھی ملاقات کی۔ ملاقات کے دوران فریقین نے دفاع اور سلامتی کے شعبے میں تعاون کو مزید مضبوط بنانے کے عزم کا اظہار کیا۔

انہوں نے سعودی معاون وزیردفاع انجینئر طلال عبداللہ العتیبی،سعودی شاہی مسلح افواج کے سربراہ ایئر چیف مارشل فیاض بن حمید بن رقیب الرویلی اور سعودی بری فوج کے سربراہ لیفٹیننٹ جنرل فہد بن سعود الجوہانی سے بھی ملاقات کی۔