صدر آصف علی زرداری اور وزیراعظم محمد شہباز شریف نے شہریوں کو درست اور مستند معلومات کی فراہمی اور معلومات تک رسائی کے حق کے تحفظ کے حکومتی عزم کا اعادہ کیا ہے۔
آج منائے جانیوالے معلومات تک رسائی کے عالمی دن کے موقع پر اپنے الگ الگ پیغامات میں انہوں نے کہا کہ معلومات تک رسائی بنیادی حق ہے جو شفاف، جوابدہ اور باخبر معاشرے کی بنیاد ہے۔
صدر آصف علی زرداری نے اپنے پیغام میں کہا کہ ڈیجیٹل پلیٹ فارمز، مصنوعی ذہانت اور دیگر ابھرتی ہوئی ٹیکنالوجیز کی تیز رفتار ترقی نے معلومات کی تیاری، ترسیل اور استعمال کے طریقہ کار کو تبدیل کر دیا ہے۔
انہوں نے زور دیا کہ شہریوں کو قابل اعتماد ذرائع سے مستند معلومات حاصل کرنے کے قابل ہونا چاہیے، خصوصاً ان معاملات میں جو براہ راست ان کی زندگیوں کو متاثر کرتے ہیں۔
وزیراعظم شہباز شریف نے اپنے پیغام میں کہا کہ حکومت جدید ٹیکنالوجیز اور ڈیجیٹل پلیٹ فارمز سے استفادہ کرتے ہوئے سرکاری اداروں اور شہریوں کے درمیان موثر رابطے کو مزید مضبوط بنانے کیلئے اقدامات کر رہی ہے۔
انہوں نے کہا کہ سرکاری دفاتر اور اداروں کے ریکارڈ کو ڈیجیٹل بنانے کا عمل جاری ہے تاکہ اسے محفوظ رکھا جا سکے اور عوام کی معلومات تک رسائی کو یقینی بنایا جا سکے۔
