پاکستان اور چین نے خلائی تعاون کو فروغ دینے اور چین کے خلائی اسٹیشن کیلئے خلائی پرواز پر پہلے پاکستانی خلاباز کو تربیت دینے کا معاہدہ کیا ہے۔

اس معاہدے پر اسلام آباد میں دستخط کئے گئے، وزیراعظم شہبازشریف اس موقع پر موجود تھے۔

انہوں نے اس موقع پر کہا کہ یہ معاہدہ گزشتہ کئی دہائیوں سے خلائی تعاون اور دیگر شعبوں میں باہمی تعاون مزید مستحکم کرنے کیلئے چینی حکومت کا ایک شاندار اقدام ہے۔

وزیراعظم نے کہا کہ ہم چین کے تعاون سے پاکستان MANNED مشن کو آگے بڑھانے کے خواہشمند ہیں۔

انہوں نے اس پروگرام کو کامیاب بنانے پر زوردیا اور پاکستانی نوجوانوں کیلئے نئے مواقع تلاش کرنے کیلئے اسے مفید قراردیا۔

خلائی تحقیق میں پاکستان کے سفربارے میں بریفنگ دیتے ہوئے سپارکو کے چیئرمین محمد یوسف خان نے کہا کہ پاکستان کے تین مشاہداتی سیٹلائٹس خلا میں ہیں جو مکمل طور پر فعال ہیں۔

انہوں نے کہا کہ اس سال کے آخر تک مزید چار سیٹلائٹس خلا میں چھوڑے جائیں گے جس سے ملک کی مطلوبہ ضرورت پوری ہوگی۔

سپارکو کے چیئرمیں نے کہا کہ انسانی خلائی مشن کا اقدام ہماری کامیابی کا ثبوت ہے اور خلائی سائنس کے شعبے میں ہمارا کردار ہمارے عزم کو ظاہر کرتا ہے۔