عالمی بینک گروپ نے نجی شعبے کی سرگرمیوں کو وسعت دینے اور سرمایہ کاری کو متحرک کرنے کے لیے پاکستان کی کوششوں میں مدد کا اعادہ کیا ہے۔
اس بات کا اعادہ عالمی بینک گروپ کے صدر اجے بنگا نے جمعہ کے روز بینکاک میں وزیر اقتصادی امور احد خان چیمہ سے ملاقات کے دوران کیا۔
اجے بنگا نے کاروباری اداروں اور ان سے مستفید ہونے والوں کے لیے پائیدار نتائج یقینی بنانے کی صلاحیت رکھنے والے مالیاتی اداروں اور نجی شراکت داروں کے محتاط انتخاب کی اہمیت پر بھی زور دیا۔
وفاقی وزیر نے سرمایہ کاری، جدت اور روزگار کے مواقع پیدا کرنے کے محرک کے طور پر نجی شعبے کو مضبوط بنانے کے حکومتی عزم کو اجاگر کیا، جس میں دو ہزار اٹھائیس تک چھوٹے اور درمیانے درجے کی صنعتوں کے لیے مالی معاونت دوگنا کرنے کا ہدف بھی شامل ہے۔
فریقین نے مستقبل کی منصوبہ بندی پر مبنی ایسی شراکت داری کے عزم کا اعادہ کیا جو پاکستان کی ترقیاتی ترجیحات کو عالمی بینک گروپ کی مہارت اور سرکاری و نجی سرمایہ کاری کو متحرک کرنے کی صلاحیت کے ساتھ ہم آہنگ کرے۔
