وزیراعظم شہبازشر یف نے کہا ہے کہ ٹیکسٹائل کا شعبہ ملکی معیشت کیلئے ریڑھ کی ہڈی کی حیثیت رکھتا ہے اوران کی حکومت معیشت کی بہتری اور برآمدات میں اضافے کیلئے تاجروں سے مکمل تعاون کرے گی ۔انہوں نے یہ بات آج کراچی کے ایکسپو سینٹر میں ملبوسات اور چمڑے کی مصنوعات کی چوتھی بین الاقوامی نمائش کی افتتاحی تقریب سے خطاب کرتے ہوئے کہی ۔
وزیراعظم نے صنعتکاروں کو سراہا جنہوں نے راہ میں حائل چیلنجز اور مشکلات کے باوجود پاکستان کی ٹیکسٹائل اورچمڑے کی صنعت کے فروغ میں بھرپور کردار ادا کیا۔
شہبازشریف نے کہا ملک کی مجموعی برآمدات کا ساٹھ فیصد حصہ کپڑے کی صنعت پرمشتمل ہے اور اس شعبے کو پروان چڑھانے کیلئے ہرممکن مدد فراہم کی جائے گی ۔
وزیراعظم نے کہا کہ پاکستان عالمی ادارہ محنت جیسے بین الاقوامی اداروں کی تمام ضروریات پرعملدرآمد کرنے کیلئے پرعزم ہے ۔
وزیراعظم نے نمائش کے اہتمام پروزیرتجارت سید نوید قمر اور ان کی ٹیم کی کاوشوں کا شکریہ ادا کیا جس میں خریداروں سمیت ساٹھ ملکوں سے چار سو سے زائد غیرملکی مندوبین شرکت کررہے ہیں۔
اطلاعات ونشریات کی وفاقی وزیر مریم اورنگزیب ،وفاقی وزیرتجارت سید نوید قمر، منصوبہ بندی وترقی کے وفاقی وزیر احسن اقبال ، سندھ کے گورنر کامران خان ٹیسوری اور وزیراعلی سید مراد علی شاہ بھی اس موقع پر موجود تھے۔