بلوچستان کے وزیراعلیٰ میر سرفراز بگٹی نے وفاقی حکومت کے تیل کی قیمتوں میں کمی سے ہونے والی بچت کو صوبے میں ترقیاتی منصوبوں کے لئے استعمال کرنے کے فیصلے کو سراہا ہے۔

وزیر اعلیٰ نے کہا یہ بلوچستان کے عوام کے لئے خیر سگالی کا پیغام ہے کیونکہ یہ قومی خزانے کا پیسہ ہے اور ہر پاکستانی کا حق ہے۔

انہوں نے کہا دو رویہ ہونے سےN-25 سڑک چمن' کوئٹہ' قلات' خضدار اور کراچی کو آپس میں جوڑے گا جس سے سفری سہولت میں بہتری آئے گی اورلوگوں کو بین الاقوامی معیار کی سڑک کی محفوظ سہولت حاصل ہوگی۔

وزیر اعلیٰ نے کہا کچھی کینال منصوبے کی تکمیل سے بلوچستان میں زرعی انقلاب کے ایک نئے دور کا آغاز ہوگا کیونکہ یہ منصوبہ زرعی اراضی کی آبپاشی کے لئے بہت اہم ہے۔

وزیراعظم کے فیصلے کی تعریف کرتے ہوئے وزیر تجارت جام کمال خان نے کہا کہ اس طرح کے اقدامات سے بلوچستان کے نوجوانوں کو مستقبل کے لئے ایک نیا وژن ملے گا جس سے وہ ملک کی ترقی اور خوشحالی میں کردار اداکرسکیں گے۔

اس موقع پر گفتگو کرتے ہوئے وزیر سائنس و ٹیکنالوجی خالد حسین مگسی نے اس یقین کا اظہار کیا کہ منصوبوں کے معیار کو یقینی بنایا جائے گا۔