پاکستان نے عالمی برادری پر زور دیا ہے کہ اسلامو فوبیا کی بڑھتی ہوئی لہر سے نمٹنے کے لیے ٹھوس اور موثر اقدامات پر عمل درآمد کیا جائے۔

اسلامو فوبیا سے نمٹنے کے عالمی دن کے موقع پر دفتر خارجہ نے ایک بیان میں کہا کہ اسلامو فوبیا پر مبنی بیان بازی، نفرت انگیز تقاریر اور مسلم کمیونٹیز، مساجد اور مقدس نشانات پر حملوں کے واقعات بنیادی انسانی حقوق اور مذہبی آزادی کے اصولوں کی سنگین خلاف ورزی ہیں۔

دفتر خارجہ نے کہا کہ اسلاموفوبیا کے خلاف عالمی جنگ میں ایک سرکردہ آواز کے طور پر پاکستان تمام مذاہب اور ثقافتوں کے درمیان رواداری، ہم آہنگی اور باہمی احترام کو فروغ دینے کے لیے عالمی برادری کے ساتھ کام جاری رکھنے کا منتظر ہے۔