وزیرِاعظم محمد شہباز شریف نے ڈھاڈر، بولان پاس میں جعفر ایکسپریس پر بزدلانہ حملے کی شدید الفاظ میں مذمت کی ہے۔
وزیراعظم نے کہا ہے کہ دہشتگردوں کے خلاف جاری کارروائی میں سکیورٹی فورسز کے افسران و اہلکار بہادری و پیشہ ورانہ مہارت سے انکا سدباب کر رہے ہیں،دشوار راستوں کے باوجود آپریشن میں شامل سکیورٹی فورسز کے افسران و اہلکاروں کے حوصلے بلند ہیں۔
انہوں نے کہا کہ سکیورٹی فورسز بروقت کاروائی اور بہادری سے بزدل دہشتگردوں کو پسپائی پر مجبور کررہے ہیں، سکیورٹی فورسز کے افسران و اہلکار بہت جلد اس آپریشن میں کامیاب ہوں گے اور بزدل دہشتگردوں کو انکے انجام تک پہنچائیں گے.
وزیراعظم نے کہا کہ بزدلانہ حملہ کرنے والے حیوان صفت دہشتگرد کسی رعایت کے مستحق نہیں، دہشتگرد بلوچستان کی ترقی کے دشمن ہیں، دہشت گردوں کا رمضان المبارک کے پرامن اور بابرکت مہینے میں معصوم مسافروں کو نشانہ بنانا اس بات کی واضح عکاسی ہے کہ ان کا دین اسلام، پاکستان اور بلوچستان سے کوئی تعلق نہیں۔
وزیراعظم نے عزم ظاہر کیا ہے کہ دہشتگردی کی عفریت کے ملک سے مکمل خاتمے تک اس کے خلاف جنگ جاری رکھیں گے، پاکستان میں بد امنی و انتشار پھیلانے والی ہر سازش کو ناکام بنائیں گے، ملک دشمن عناصر کے ناپاک عزائم کو کبھی کامیاب نہیں ہونے دیں گے.
انہوں نے کہا ہے کہ دہشتگردی کی اس جنگ میں پوری قوم اپنی سکیورٹی فورسز کے شانہ بشانہ کھڑی ہے۔
