امریکی ناظم الامور نیٹلی بیکر نے خیبرپختونخوا کے گورنر فیصل کریم کنڈی سے اسلام آباد میں ملاقات کی۔ ملاقات کے دوران خیبرپختونخوا میں معدنیات، سیاحت، توانائی، صحت اور تعلیم کے شعبوں میں سرمایہ کاری کے مواقع پر تبادلہ خیال کیا گیا۔

گورنر نے کہا کہ خیبرپختونخوا قیمتی اور نایاب معدنی وسائل سے مالا مال ہے اور یہاں سرمایہ کاری کے وسیع مواقع ہیں۔ انہوں نے پاکستان اور امریکہ کے درمیان دو طرفہ تجارتی حجم بڑھانے کے لیے تجارتی وفود کے تبادلے کی ضرورت پر بھی زور دیا۔

نیٹلی بیکر نے خیبرپختونخوا کے نوجوانوں کے لیے جدید تربیت اور ہنرمندی کے فروغ کے اقدامات میں تعاون میں دلچسپی ظاہر کی۔

فریقین نے نوجوانوں کے لیے تعلیمی وظائف کے مواقع بڑھانے پر بھی بات چیت کی اور صوبے میں ترقیاتی تعاون اور سرمایہ کاری کو فروغ دینے پر اتفاق کیا۔