پاکستان ایگریکلچرل سٹوریج اینڈ سروسز کارپوریشن اور یوٹیلٹی سٹورز کارپوریشن کی بندش کے حوالے سے پیش رفت کا جائزہ لینے کے لیے آج اسلام آباد میں وزیرِ خزانہ محمد اورنگزیب کی زیرِ صدارت اجلاس ہوا۔

یوٹیلٹی سٹورز کارپوریشن کے حوالے سے اجلاس کو بتایا گیا کہ ضروری آڈٹ اور تصدیقی نظام کے ذریعے ملازمین کی ادائیگیوں اور تصدیق شدہ واجبات کی ادائیگی میں نمایاں پیش رفت ہوئی ہے۔

وزیرِ خزانہ نے کہا کہ بندش کے عمل کے ساتھ قانونی، مالی اور انتظامی تقاضے بھی پورے کیے جائیں۔

اجلاس میں پاسکو کی بندش کے عمل پر بھی پیش رفت کا جائزہ لیا گیا، جس میں ذخائر کی صورتحال اور باقی کام مکمل کرنے کے لیے درکار انتظامات شامل ہیں۔

وزیرِ خزانہ نے صوبائی حکام کے ساتھ قریبی رابطے کی اہمیت پر زور دیا تاکہ یہ معاملات بندش کے مجموعی عمل میں تاخیر کا سبب نہ بنیں۔