وزیراعظم محمد شہباز شریف نے کہا ہے کہ گھریلو صارفین اور صنعتوں کیلئے بجلی کے قیمتوں میں مزید کمی لائیں گے۔

وزیرِاعظم محمد شہباز شریف کی زیرِ صدارت بجلی شعبے کی اصلاحات پر عملدرآمد سے متعلق جائزہ اجلاس آج (جمعہ) اسلام آباد میں منعقد ہوا.

وزیراعظم نے بجلی شعبے میں اصلاحات پر اطمینان کا اظہار کرتے ہوئے کہا کہ ان اصلاحات کے مثبت ثمرات موصول ہو رہے ہیں.

انہوں نے کہا کہ عوام سے وعدہ کیا تھا کہ انہیں کم لاگت ماحول دوست بجلی کی فراہمی یقینی بنائیں گے، آئی پی پیز سے معاہدوں پر نظر ثانی سے قومی خزانے کو بچت اور صارف کیلئے بجلی کی قیمت میں کمی واقع ہو رہی ہے۔

انہوں نے انسداد بجلی چوری مہم کے نتائج کو خوش آئند قرار دیتے ہوئے کہا کہ بجلی چوری کے خلاف مہم کو مزید تیز کرکے تقسیم کار کمپنیوں کے خسارے میں 100 فیصد کمی لائیں گے۔

وزیراعظم نے کہا کہ بجلی کی تقسیم کار کمپنیوں میں نجی شعبے سے اچھی شہرت کے بورڈ ارکان کی تعیناتی سے کمپنیوں کی کارکردگی میں بہتری آرہی ہے، انہوں نے ہدایت کی کہ جن کمپنیوں کے بورڈ تشکیل نہیں دئیے گئے، ان میں بھی جلد نجی شعبے سے اچھی شہرت کے بورڈ ارکان تعینات کر دیئے جائیں.

 اجلاس کو بتایا گیا کہ بجلی شعبے کی اصلاحات و انسداد چوری مہم کے نتیجے میں دسمبر 2024 تک تقسیم کار کمپنیوں کی وصولیاں بہتر ہوکر 93.26 فیصد پر پہنچ گئیں، اجلاس کو گردشی قرضے میں مرحلہ وار کمی کے لائحہ عمل، بجلی کی ترسیل کیلئے مسابقتی مارکیٹوں کے قیام، بجلی کے ٹیرف میں کمی و دیگر اصلاحات کی معینہ مدت کے حوالے سے بھی آگاہ کیا گیا.

اجلاس کو 500 کے-وی لائن کے مٹیاری-مورو-رحیم یار خان اور غازی بروتھہ-فیصل آباد ٹرانسمیشن لائینز منصوبوں پر پیشرفت کے حوالے سے بھی آگاہ کیا گیا.

اجلاس کو نیشنل ٹرانسمیشن اینڈ ڈسپیچ کمپنی کی تحلیل اور نئی کمپنی انرجی انفراسٹرکچر، ڈویلپمنٹ اینڈ مینجمنٹ کمپنی (EIDMC) کے قیام کے حوالے سے پیش رفت پر بھی بریف کیا گیا.