فائل فوٹو

نائب وزیراعظم اسحاق ڈار نے کہا ہے کہ صومالیہ کے ساحل کے قریب ہائی جیک کیے گئے آئل ٹینکر ایم ٹی آنر 25 کے باقی تین پاکستانی عملے کے ارکان کو بحفاظت بازیاب کرا لیا گیا ہے۔

انہوں نے سماجی رابطے کے پلیٹ فارم ایکس پر ایک پوسٹ میں کہا کہ عملے کے تین ارکان عمران علی، محمد یاسین اور سید حسین یوسف کو جبوتی میں پاکستانی سفارتخانے کی ایک ٹیم کے ہمراہ عدیس ابابا پہنچا دیا گیا ہے۔

انہوں نے کہا کہ یہ پاکستانی ایتھوپین ایئرلائنز کی کراچی آنے والی پہلی دستیاب پرواز کے ذریعے وطن روانہ ہوں گے، جو بدھ کو متوقع ہے۔

نائب وزیراعظم نے عملے کی رہائی یقینی بنانے میں معاونت اور تعاون پر صومالیہ کی حکومت اور ایم ٹی آنر 25 کے قریب موجود یورپی یونین نیول فورس آپریشن اٹلانٹا کا پاکستان کی جانب سے شکریہ ادا کیا۔